Ier midsiuwsk Frisia troch de eagen fan Fikingen, it Aldfrysk en de hjoeddeistige ûndersiker

Yn ‘e iere midsiuwen stie ús kustgebiet bekend as Frisia. Oer see wie dat Frisia nau ferbûn mei de wrâld fan Fikingen en oare Noardseekustbewenners, it belang fan de kust as wengebiet stie sintraal. Nettsjinsteande regionale ferskillen wie de ferbûnens fan de kusten sa grut dat wy sels sprekke kinne fan in Noardseewrâld. Tagelyk waard Frisia ûnderdiel fan it grutte kontinintale Frankyske ryk, dat in tsjinhinger foarme fan dizze Noardseekrâld. Wat betsjutte dit foar de posysje fan Frisia? Hoe witte wy dat Frisia sa sterk ferbûn wie mei oare kusten, mar ek ûnderdiel wie fan it kontinint? En wat sizze Friezen, Fikingen, Franken en oaren hjiroer? 

Om Frisia yn de perioade fan de achtste oant de alfde iuw goed te begripen, moatte wy ferskate perspektiven neist inoar lizze. Net allinnich de perspektiven fan bygelyks Fryske kustbewenners, Frankyske machthawwers en foarbyfarrende Fikingen, mar ek dy fan de hjoeddeiske ûndersiker. Yn dizze lêzing nimt dr. Nelleke IJssennagger-van der Pluijm (direkteur Fryske Akademy) dy fia materiële kultuer, mûnlinge tradysjes, taal en it maritime lânskip mei nei dizze wichtige en yntrigearjende wrâld fan Frisia en nei it ûndersyk dat dêrnei dien wurdt. 

Wat kitsch hjirmei te krijen hat? Dat fertelt se dy graach yn de lêzing.

19.30 – 20.00 Ynrin publykslêzing

20.00 – 21 .30 Lêzing

21.30 – 22 .00 Ofsluting mei buorrel

Oanmelde kin hjir.

Pinkstertiisdei

Dizze lêzing makket diel út fan Pinkstertiisdei: in dei yn it ramt fan de Fryske midsiuwen – ús dielde skiednis. Dit tema wolle wy fan no ôf alle jierren ûnder de oandacht bringe by publyk en professionals op ‘Pinkstertiisdei’. Want op de tiisdeis nei Pinkster, sa witte wy út midsiuwske boarnen, teagen rjochters út alle Fryske regio’s alle jierren nei de ‘Ustalsbeam’ – in plak by it East-Fryske Aurich – dêr’t se rjocht sprutsen en nije ôfspraken makken. De perfekte dei dus om nije ‘Aldfryske’ netwurken te smeien!

Yn 2024 is Pinkstertiisdei yn it ramt fan edukaasje. It middeisprogramma is tige nijsgjirrich foar professionals yn it ûnderwiis en ûnderwiisprofessionals yn spee, mar ek foar oare professionals op it mêd fan skiednis en minderheidstalen.