Dit sympoasium is folboekt, oanmelde is net mear mooglik.

Ta gelegenheid fan it ferskinen fan de biografy, skreaun troch Jan Gulmans, oer it libben en wurk fan prof. dr. Fokke Sierksma (1917-1977) beljochtet it sympoasium ferskillende fasetten fan dizze Fries dy’t yn hast fjouwer desennia in belangryk yntellektueel wie.

‘Wat men ook over Sierksma zou kunnen zeggen, niemand kan volhouden dat hij een afwezige is. Integendeel, hij was niet alleen duidelijk aanwezig tijdens zijn leven, maar hij is dit ook nu na zijn voortijdige dood nog steeds’, sa beskreau Theo van Baaren syn kollega en freon Sierksma yn 1977.

Dizze bliuwende oanwêzichheid fan Fokke Sierksma – faak in geastlik omnivoar neamd – troch syn ideeën, boeken, wurden en dieden, wie ien fan de driuwfearren om dizze biografy te skriuwen.

Yn tweintich haadstikken wurdt net allinne Sierksma syn libbensrin sketst, mar ek syn grutte oeuvre dat him beweecht op tal fan mêden: fan de Fryske en Nederlânske literatuer (fan Obe Postma, Douwe Tamminga en Anne Wadman oant en mei Gerrit Achterberg, Jacques Bloem en Adriaan Roland Holst), oarloch en ferset, akkulturaasje, ûngelikens fan de seksen, religieuze projeksje, moade en klean, skilderkeunst, kultuerkrityk, mystyk, oant en mei de kultuer fan Tibet.

Ek wurdt yngien op Sierksma syn rol yn de Twadde Wrâldoarloch; hy wie belutsen by de Luisterpost. Dizze fersetsgroep harke oan de ein fan de oarloch út boekhannel Wielenga yn de Nieuwe Oosterstraat de Dútske Sicherheitsdienst (yn it Burmaniahuis yn Ljouwert) ôf. Sierksma – yn syn minskefyzje sterk beynfloede troch dizze riskante perioade – beskreau de gong fan saken op dizze Luisterpost yn syn boek Grensconflict. Sierksma neamde himsels oait in oarlochsynfalide. De ûnderfiningen yn de perioade fan de Luisterpost hienen in traumatisearjend effekt op him en syn famylje.

Programma:

13.00 oere ynrin.

13.30 oere iepening troch Geart de Vries.

13.40 oere lêzing troch Yme Kuiper: ‘Drie ongelovige vrienden in de ban van religie en magie: Theo van Baaren (1912-1989), Fokke Sierksma (1917-1977) en W.F. Hermans (1921-1995).’

14.10 oere lêzing troch Wim Hofstee: ‘Bewondering zonder volgzaamheid. Fokke Sierksma en Gerardus van der Leeuw.’

14.40 oere skoft.

15.10 oere lêzing troch Huub Mous: ‘Secularisatie als bron van godsdienstwaan, Fokke Sierksma en the sixties.’

15.40 oere lêzing troch Jan Gulmans: ‘De blijvende aanwezigheid van Fokke Sierksma’. 

Oanslutend folget de oanbieding fan de biografy Bezeten bruggenbouwer. It boek is ek te keap.

16.10 oere ôfsluting en neisit (mei drankje en hapke).