It gerjochtshôf Arnhem-Ljouwert draacht de biblioteek fan it Hof van Friesland oer oan Tresoar. Ta eare fan de oerdracht wurdt in miny-sympoasium organisearre yn it Paleis fan Justysje yn Ljouwert.

It Hof van Friesland fungearre oant 1811 as de heechste rjochtsprekkende ynstelling yn Fryslân. De biblioteek fan it Hôf bestiet út sa’n 2.000 bannen mei ferskate ûnderwerpen. Dêr sitte fansels in soad boeken oer rjocht tusken, mar ek neislachwurken en sels prachtige atlassen. Fan Wilhelminaplein nei Bûterhoeke

Fan it yngebrûk nimmen fan it Paleis fan Justysje oan it Wilhelminaplein yn 1850 ôf hat de biblioteek dêr húsfeste west, oant de grutte brân yn it Paleis yn 1919. Yn in uterst besykjen om safolle mooglik boeken te hoedzjen foar ferbrâning, waarden se út de ruten smiten en dêrtroch waarden in soad bannen swier skansearre. De presidint fan it Gerjochtshôf hat dêrnei de boekerij yn bewar jûn oan de Provinsje Fryslân, dy’t de boeken yn behear jûn hat oan de Provinsjale Biblioteek, ien fan de foarrinners fan Tresoar. Nei de biblioteekkolleksje al dy jierren bewarre te hawwen, is Tresoar bliid dat it gerjochtshôf Arnhem-Ljouwert de biblioteekkolleksje fan it Hôf op 5 maart offisjeel oan Tresoar oerdrage sil. Sprekkers 5 maart

By it sympoasium op dy dei set de presidint fan it gerjochtshôf de bewarjouwing fan de biblioteek fan it Hof van Friesland offisjeel om yn in skinking. Dêrneist stean der twa lêzingen op it programma. Drs. Anne Tjerk Popkema, spesjalist Aldfrysk en boekskiednis by Tresoar, hâldt in ynlieding oer de ynkunabelen fan de Hôfbiblioteek. De twadde sprekker is prof. dr. Hylkje de Jong, heechlearaar oan de Vrije Universiteit Amsterdam (VU). Sy hâldt in ynlieding oer de biblioteek fan it Hôf yn relaasje ta it projekt Hof van Holland, Utrecht en Friesland; in gearwurkingsprojekt fan de VU en Tresoar oer achttjinde-iuwske sivile prosesstikken fan dy trije gerjochtshôven. Tiden, lokaasje en oanmelde

It miny-sympoasiumis op 5 maart en duorret fan 19.45 oant 21.15 oere. Ynrin fan 19.30 oere ôf en nei ôfrin fan it plenêre programma in buorrel (oant 22.00 oere).

Lokaasje: Paleis fan Justysje, Wilhelminaplein 1, Ljouwert

De tagong is fergees, mar oanmelde is ferplichte.