‘Oan ’e ein fan De Oere’, it Kadoboek, skreaun troch Anne-Goaitske Breteler, foar de Fryske Boekewike (8 o/m 16 novimber 2025), fertelt it oangripende ferhaal fan de fjouwer bern fan de famylje Zwart. It grutste part fan harren libben wennen de net-troude broers Pieter, Jan, Dirk en harren suster Wytske mei-inoar op it âlderlik stee: in pleats yn Moddergat.  

Troch it famyljeferhaal op te tekenjen, komt de lêzer ticht by in bysûnder gesin dat nettsjinsteande grutte feroaringen trou bleau oan it leauwen, oan elkoar en oan it âlde hiem. De tol dy’t sa’n libbenswize easke, wie foar elk gesinslid oars. Fan stille offers oant eksintrike útsprutsenheid, fan leafde dy’t net ta bloei komme mocht oant de stadige delgong fan in boerepleats dy’t mear en mear fertutearzet. 

It Kadoboek ‘Oan ’e ein fan De Oere’ jout in unyk ynsjoch yn in wrâld dy’t net wer weromkomt. It is in portret fan ferlies en fassinaasje – mar ek fan de fraach: wat betsjut it as in famylje, en harren erfgoed, ynhelle wurdt troch de tiid en driget wei te wurden?

It boek ferbynt mûnlinge skiednis, fotomateriaal en literêre non-fiksje ta in djippe refleksje oer tiid, ferlies en de krêft fan lytse ferhalen yn in grutte wrâld.

De skriuwer fan it Kadoboek, Anne-Goaitske Breteler, jout yn de Fryske Boekewike in tal lêzingen rûnom yn de provinsje. By de lêzing komme de personaazjes fan de famylje Zwart op in oansprekkende wize ta libben – yn wurden, bylden én unyk fideomateriaal. Yn in programma fan in oere wurdt it publyk meinommen yn it bysûndere libben fan in húshâlding dy’t net fergetten wurde mei.

Lêzingen ‘Oan ’e ein fan De Oere’ – Anne-Goaitske Breteler, Frysk Kadoboek 2025

• 10 novimber, 19.30 – 21.00 oere, Bibliotheek Heerenveen, It Hearrenfean
• 12 novimber, 20.00 – 21.30 oere, NUT Burgum, De Pleats, Burgum
• 13 novimber, 20.00 – 21.30 oere, Podium Gorter, Balk
• 14 novimber, 19.30 – 21.00 oere, Theaterkerk, Nes

Alle optredens binne fergees tagonklik en by alle optredens is in ferskaat oan Fryske boeken te keap. It Frysk Kadoboek ’Oan ‘e ein fan De Oere’ is de hiele Fryske Boekewike fergees te krijen by oankeap fan €15,00 oan Fryske boeken.