Dit jier fiert it wrâldferneamde printeboek Kening & Kening in jubileum, it bestiet 25 jier! En om dêr by stil te stean jouwe beide makkers, Linda de Haan en Stern Nijland, in masterclass én in workshop. Do kinst der by wêze! 

It ferhaal fan Kening & Kening giet oer in kroanprins dy’t gjin nocht hat om te trouwen, mar as er kening wurde wol, sil dat al moatte. Syn mem lit de iene nei de oare prinses oerkomme, mar mei net ien sjocht er it sitten. Oant… er in knappe prins treft. In spetterjend houliksfeest folget en se libje noch lang en lokkich.

It boek wie it debút fan Stern Nijland en Linda de Haan. De tekst skreaunen se mei har beiden en ek de kleurige yllustraasjes makken se mei har beiden.

Yn dizze masterclass nimme Linda de Haan en Stern Nijland de dielnimmers mei yn de skiednis fa it klassike printeboek Kening & Kening, dat tagelyk yn it Nederlânsk, Frysk, Dútsk en Deensk ferskynde. It earste LGBTQI+ boek foar jonge bern is yn hiel wat talen oerset. It boek tsjinne as ynspiraasje foar ferskillende produksjes, fan iepenloft oant ballet en brocht de makkers in soad moetingen. Dêr fertelle se oer en ek fertelle se hoe’t se it printeboek makke hawwe: yn kollaazjetechnyk.

Nei dizze masterclass folget in workshop* en kinne de dielnimmers sels oan de slach om in eigen kollaazje te meitsjen. Kinst derfoar kieze om inkeld de masterclass te folgjen of de masterclass mei de workshop te dwaan. Jou by dyn oanmelding oan oftst de workshop ek folgje wolst! Foar de workshop is beheind plak.

Mear ynformaasje

• datum: 22 novimber 2025
• tiid: 14:00-16:00 oere
• plak: Tresoar
• tickets

*Foar dizze workshop jildt: fol=fol. 

De masterclass en workshop is foar folwoeksenen bedoeld.