De opkomst fan de treddepersoansoansprekfoarm

Yn Fryslân kinst ien net allinnich mei ‘do’ of ‘jo’ oansprekke, mar ek yn de tredde persoan, lykas yn ‘Mem, kin mem my helpe?’ Dat bart faak yn de famyljesfear, mar komt ek foar op de wurkflier of op skoalle, lykas in studint dy’t oan Gerbrich freget: ‘Hat Gerbrich de tentamens al neisjoen?’ Dy gewoante makket de Fryske oansprekfoarmen in nijsgjirrich ûnderwerp fan ûndersyk.  

Want wêrom gjin ‘do’ of ‘jo’? Yn de lunchlêzing dy’t Gerbrich de Jong op 15 jannewaris hâldt, lit se sjen hoe’t dy oansprekfoarm brûkt waard yn de tiid fan it Midfrysk en Nijfrysk. De literêre kolleksje fan Tresoar wie foar har datasamling fan grutte betsjutting, sawol foar it Midfrysk as foar it Nijfrysk (nei 1800).

Gerbrich de Jong wurket as learare-oplieder Nederlânsk en Frysk by NHL Stenden Hogeschool en krige yn 2023 in NWO Promotiebeurs voor leraren om promoasje-ûndersyk te dwaan nei Fryske oansprekfoarmen.Lunchlêzing

Mear ynformaasje en oanmelde

De lêzing begjint om 12.30 oere en duorret rûchwei 45 minuten oant in oere. De tagong is fergees, al jildt wol in ferplichte oanmelding. By it oanmelden kinst oanjaan ast gebrûk meitsje wolst fan de lunch foarôfgeand oan de lêzing (in lúks broadsje* en 1 konsumpsje). De lunch stiet fan 12 oere ôf klear. De kosten foar de lunch binne € 7,50, te beteljen by it reservearjen fan in tagongsbewiis. Yn ferbân mei it yn it foar bestellen fan de lunch, is it net mooglik om op de dei sels in lunch te bestellen – dat moat foarôf.

* De broadsjes binne geskikt foar fegetariërs.

Oanmeldtips:

• In Eventbrite-account is net nedich.
• Jou by it oanmelden oan mei hoefolle persoanen oftst komst. Kinst meardere tickets yn ien kear bestelle.
• Bestelst in lunch, dan hoechst net in los ticket te bestellen: lunch en ticket binne tegearre ien bestelling.
• De befêstiging fan de bestelling duorret soms wat langer. Check ek dyn spam/net-winske mailbox!
• Utprintsjen fan de tickets is net nedich.

Oanmelde kin fia Tresoar/Eventbrite