Genealogysk Wurkferbân kolleezjetoer mei Tjitte de Vries en Henk van der Veer: En toch willen we liever hier blijven

Tjitte de Vries is de skriuwer fan it boek “En toch willen we hier liever blijven” (2022). De Vries fertelt it oangripende ferhaal fan syn Joadske foarâlden (Landau) dy’t foar de oarloch út Poalen flechten en yn Amsterdam in nij libben opbouden. Hja fielden har dêr feilich en thús mar fernamen al rillegau dat se ek dêr har libben net seker wiene. 

“Ik ha myn foarâlden en myn âlden better kennen leard. In byld krigen fan lokkige jierren dy de famyljes Landau en har freonen yn Amsterdam trochbrochten. Krantestikken en advertinsjes út dy perioade kleuren dy tiid ta in haadstik oer de my oant doe ta ûnbekende âldomke Mosiek Landau”. 

It is de winsk fan Tjitte de Vries dat in it boek lêze en sjen sille hoe maklik it giet om in groep minsken stap foar stap út te sûnderjen, te isolearjen en te fernederjen. Tagelyk priizget hy de minsken dy’t mei gefaar fan eigen libben syn Joadske famyljeleden ûnderdak ferlienden.

NB. It boek is yn it skoft foar € 15,00 te keap.

Tjitte de Vries en Henk van der Veer

Tjitte de Vries (1951) is berne yn Snits, soan fan in grifformearde heit en in Joadske mem, studearre rjochten yn Grins. Hy wurke 35 jier as miljeu-adviseur by de provinsje Grins.

Henk van der Veer (Snits 1954) sil dizze middei lieding jaan oan it petear mei ús gast en de harkers yn de seal gelegenheid jaan om him neier te befreegjen. Nei de Kweekskoalle (letter: De Him) yn Snits waard Van der Veer ûnderwizer oan de skoalle op De Hommerts (1978 – 2003). Skriuwe en dichtsje die er earder al mar benammen nei 2000 koe er syn earste leafde as skriuwer hielendal útlibje.

Mear ynformaasje

Belangstellenden binne fan herten wolkom by dizze presintaasje yn Tresoar, fan 13:30 oant 16:00 oere op sneon 3 jannewaris. De tagong is fergees en oanmelde is net nedich. De gearkomste is yn it Frysk, Hollânsk en Snitsers. De organisaasje fan dizze middei is yn hannen fan it Genealogysk Wurkferbân fan de Fryske Akademy.