Op 17 oktober is der wer in jûn foar de Freonen fan Tresoar. Ek gasten binne fan herte wolkom.

It ûndersyk fan Richthofen-Fellow Laura Bruno by Tresoar rjochtet him op 6 fan de 10 hânskriften út de Richthofenkolleksje. Wrâldwiid de grutste samling fan Aldfryske rjochtshânskriften.

De Richthofenkolleksje is yn 2022 tafoege oan it Nederlânske ‘Memory of the World’ register. Foarôfgeand oan dizze lêzing sil Anne Tjerk Popkema, spesjalist Aldfrysk by Tresoar, yn algemiene sin wat fertelle oer dizze ferneamde kolleksje, sadatst in idee krijst fan it belang fan Bruno’s ûndersyk.
Yn it twadde part fan de jûn sil de Stifting in boekgeskink oanbiede oan Tresoar. Rolf Bremmer sil dat taljochtsje. Ek ûndersyksgroep Pastei biedt in bysûnder boek oan, dêr’t Herre de Vries in koarte taljochting by jaan sil.

De jûn is fergees foar sawol de Freonen fan Tresoar as foar gasten. Yn ferbân mei it tal sitplakken is oanmelden yn it foar noflik. Wolst dy foar tiisdei 10 oktober oanmelde fia info@tresoar.nl ast der by wêze wolst?Lauro Bruno

Laura Bruno is promovenda Histoaryske taalkunde oan de Universiteit Gent en skriuwt har proefskrift oer ‘dative experiencers’ yn it Aldfrysk en it Middelnederdútsk. Se begûn yn maart as Richthofen-Fellow mei in ûndersyksprojekt rjochte op de Frysk-Nedersaksyske taalkontaktsituaasje fan de Ommelannen om de tiid fan de ûntfrysking hinne.