Deputearre Steaten fan Fryslân hawwe de advyskommisje fan de Gysbert Japicxpriis 2025 beneamd. De Gysbert Japicxpriis is de wichtichste literêre priis fan Fryslân. Sûnt 1947 wurdt dizze om it jier útrikt. It iene jier foar Frysktalige proaza, it oare jier foar Frysktalige poëzy. Yn 2025 wurdt de priis takend foar poëzy. De namme fan de priis ferwiist nei de Fryske dichter Gysbert Japicx. Hy wurdt sjoen as de grûnlizzer fan it Frysk as skreaune taal.

De advyskommisje bestiet út:

Johanneke Liemburg (1952) is promovearre op Fedde Schurer, dêr’t se in biografy oer skreau. Yn 2023 ferskynde fan har hân in biografy oer Geertje Lycklama à Nijeholt.

Sytse Jansma (1980) is dichter en skriuwer, mei ferskate publikaasjes op syn namme. Foar syn Nederlânsktalige bondel Rozige maanvissen (2023) krige er dit jier de C. Buddingh’-prijs foar it bêste debút.

Ytsje Hoekstra (1961) is dichter en wie ûnder oaren haadredakteur fan it literêr tydskrift Farsk.

Op basis fan it advys fan de kommisje wurdt troch Deputearre Steaten fan Fryslân de winner fan de Gysbert Japicxpriis keazen. De priis wurdt yn de hjerst fan 2025 útrikt.