Op 21 oktober 2024 is Frysk skriuwer Ulke Hessel Brolsma (1943) út Zaandam ferstoarn. Hy skreau koarte ferhalen en romans, en wûn yn 2000 in Rely Jorritsmapriis.

Brolsma groeide op yn Grou en folge in oplieding ta ûnderwizer en sjoernalist. Hy wie wurksum as gemeentefoarljochter. Hy kaam út in skriuwerslaach, mar stapte sels pas op lettere leeftyd yn de literêre spoaren fan syn heit Liuwe Brolsma (1912-1976) en pake Reinder Brolsma (1882-1953). Syn pake wie lange tiid ien fan de produktyfste en meast lêzen Fryske skriuwers. It wie Doeke Sijens, biograaf fan syn pake Reinder, dy’t him op bysûndere wize oantrúnde om ek ris kreätyf te skriuwen.

‘Doeke Sijens makke in boek oer myn pake, hy kaam dêrfoar wol by ús oer de flier. Ik krige ris in krystkaart fan him en dêr stie op: ‘Dyn heit en pake koene skriuwe en do makkest der neat fan. Bêste lokwinsken foar it nije jier, Doeke Sijens.’ Doe waard ik in bytsje lilk en bin ik achter de kompjûter sitten gien, haw in pear sinnen skreaun en foar’t ik it wist hie ik in ferhaal ôf’, sa fertelde er yn 2016 (webside Ensafh).

Brolsma begûn mei it skriuwen fan koart ferhaal ‘It hûs’, dat publisearre waard troch literêr tydskrift Trotwaer. It wie foar Brolsma in stimulâns om fierder te gean. Ferhalen fan syn hân ferskynden njonken Trotwaer ek op de ynternet-tydskriften Kistwurk en Farsk. Yn 2000 krige er foar syn ferhaal ‘Ioana’ in Rely Jorritsmapriis.

Yn boekfoarm debutearre hy yn 2001 mei de ferhalebondel Ioana: in samling fan syn earder skreaune koarte ferhalen. Se spylje harren net allinnich ôf yn Fryslân, mar guon ek yn Roemenië, Frankryk of Peru. Ien fan de sintrale tema’s is de relaasjeproblematyk en ûnmooglike leafdes. Syn styl wie koart en direkt en hy wist fakentiids in bysûnder soarte spanning op te roppen.

As Fries om utens skreau Brolsma ek geregeld oer syn heitelân, en dan benammen oer syn bertedoarp Grou. Yn 2016 ferskynde Oarloch yn en om Grou, oer de Twadde Wrâldoarloch sa’t dy yn Grou belibbe waard. Yn ’e rin fan de oarloch kamen der hieltyd mear ûnderdûkers, mar ek it ferset naam ta. Yn septimber 1944 lei de besetter beslach op de filla fan fabryksdirekteur Halbertsma. De Grüne Polizei iepene de jacht op Joaden en fersetsminsken, fan wa’t de measten begjin maart 1945 oppakt waarden. Brolsma gie nei wa’t dizze minsken úteinlik ferret hie.