It Keninklik Frysk Genoatskip (KFG) bestiet yn 2027 200 jier. Om dat te fieren komt it KFG mei in jubileumboek mei dêryn 200 biografyen oer 200 Fryske froulju dy’t libbe hawwe tusken 1827 en 2027. Tresoar is út namme fan it KFG de pinfierder yn dit projekt. De haadredaksje is yn hannen fan Tialda Hoogeveen. De presintaasje fan it boek sil plakhawwe yn it KFG-jubileumjier, sa mooglik op 8 maart 2027: Ynternasjonale Frouljusdei.

Els Kloek

Els Kloek is ‘geastlike mem’ fan dit projekt, want troch de gearstalling fan har boeken 1001 vrouwen uit de Nederlandse geschiedenis en 1001 vrouwen in de 20ste eeuw is sy foar it KFG it grutte foarbyld om in soartgelyk projekt op te starten foar Fryslân. Letter hjoed sil op de webside fan it KFG in list mei 100 froulju beskikber wêze, mei in oprop oan it publyk om nammen oan te leverjen dy’t wat harren oangiet noch ûntbrekke op de list, sadat der in list fan 200 nammen gearstald wurde kin.Oer it boek

Yn it boek wurde biografyen opnommen fan 200 froulju dy’t yn de perioade fan 1827 oant 2027 in wichtich part fan har libben yn Fryslân wenne hawwe of in dúdlike (famylje)bân mei Fryslân hân hawwe en as sadanich ek as ‘Fryske froulju’ beskôge wurde kinne. It giet yn alle gefallen om froulju dy’t foar 2027 ferstoarn binne. De 200 biografyen wurde pleatst ûnder in tal maatskiplike tema’s dy’t yn it boek koart yntrodusearre wurde sille. Sa wurdt de gearhing ferdúdlike en ek froulju’s mienskippen sichtber makke.Sjoen it grutte súkses fan it wurk fan Els Kloek yn Nederlân ferwachtet it KFG dat in ferlykber projekt foar Fryslân ek tige oanslaan sil. It boek sil nammentlik in protte froulju dy’t oant no te min omtinken krigen hawwe, foar it fuotljocht bringe en harren it plak jaan dat sy fertsjinje yn de skiedskriuwing. By alle biografyen komt ien yllustraasje: in foto, skilderij of tekening. It boek wurdt in twatalige útjefte, de kar om in biografy yn it Frysk of Nederlânsk te skriuwen wurdt makke op basis fan de taal dy’t it bêste past by de betreffende frou en har aktiviteiten. Tresoar is út namme fan it KFG de pinfierder yn dit projekt en is fan doel nei 2027 it projekt ek digitaal in plak jaan.

Oer Tialda Hoogeveen

Tialda Hoogeveen is skriuwer en sjoernalist. Sy hat einredakteur fan de Moanne west en hat histoaryske boeken as De geur van hooi, Alstublieft, mevrouw! Een geschiedenis van de Nederlandse dienstmeisjes’ en Oerstoer, over de wolharige mammoet en de rest skreaun. Yn de jierren 2023, 2024 en 2025 is sy as Berneboeke-ambassadeur aktyf op it mêd fan de promoasje fan Fryske berneliteratuer. ‘Geweldich dat der op sa’n grutte skaal omtinken komt foar froulju dy’t wichtich west binne foar Fryslân. It liket my in moaie reis om de takom jierren mei in hiel team skiednissen fan froulju op te dûkeljen en wrâldkundich te meitsjen, sadat se sichtber wurde foar in grut publyk. It boek is hooplik in begjin fan in fierdere reis nei oare publikaasjes lykas dokumintêres, podcasts, artikels of biografyen.’