Op sneontemiddei 22 maart wurdt Willem Abma syn lêste dichtbondel Bewarre postúm presintearre. By dy gelegenheid sil Marcus Veenstra mei in gelegenheidskoar in part fan Requiem ta treast útfiere. De teksten skreaun troch Abma binne troch Veenstra op muzyk set.

Foarich jier simmer ferstoar skriuwer-dichter Willem Abma op twaëntachtichjierrige leeftyd. Abma publisearre by syn libben mear as tweintich dichtbondels, ferskate romans, koarte ferhalen en toanielteksten. Hy skreau ek geastlike lieten. Syn earste dichtbondels ferskynden ûnder it pseudonym Daniël Daen. Foar de earste trije krige er yn 1973 de Gysbert Japicxpriis. Abma wie ek belutsen by Operaesje Fers, dat yn 1968 oprjochte waard, en hy siet jierrenlang yn de redaksje fan it literêr tydskrift Trotwaer.

Op 22 maart 2025 wurdt Abma syn lêste dichtbondel presintearre ûnder de titel Bewarre. Abma seach it as in ferfolch op de bondel Ferbûn en sjoen, mimeringen oer myn leauwe en libben (2018). Hy hie it manuskript fan Bewarre krekt foar syn ferstjerren klear. Hy krige dêrby de help fan syn frou Froukje Geertsma en dichter Syds Wiersma. Yn de bondel, dy’t by útjouwerij Wijdemeer ferskynt, beskriuwt Abma hoe’t er him op lettere leeftyd ‘bewarre’ field hat: ‘Myn poëzij is bekentenisliteratuer. Earliker as yn dizze bondel kin ik it net sizze. Foar my is de sirkel rûn. Dit is myn lêste bondel.’

By de presintaasje op 22 maart yn de Mennistetsjerke oan de Wurdumerdyk yn Ljouwert sille guon fersen fan Abma foardroegen wurde. Freon Philippus Breuker liedt Abma syn literêre wurk koart yn. Nei it skoft is der in premjêre. In part fan Requiem ta treast sil ûnder lieding fan komponist Marcus Veenstra útfierd wurde.

Yn 1995 waard Marcus Veenstra tsjerkemusikus yn De Schakel yn Camminghaburen. Tegearre mei Willem Abma makke hy in oantal lieten, dêr’t God gedachte gefoel en it Liet fan treast (by de sluting fan in tsjerke) de ferneamdste fan binne. Ut dizze gearwurking ûntstie it idee foar it Requiem ta treast. Abma skreau de teksten en Veenstra sette se op muzyk. Foar de útfiering op 22 maart hat Veenstra it gelegenheidskoar Stim gearstald mei njoggen betûfte sjongers. Hy sil harren ek op piano begeliede.

Datum: 22 maart 2025
Tiid: 15.00 – 17.00 oere; ynrin fan 14.30 oere ôf
Plak: Mennistetsjerke, Wurdumerdyk 18, Ljouwert
Tagong: fergees; kom op ’e tiid want fol is fol