Op sneontemiddei 26 july om 15.00 oere feroaret de krekt restaurearre tsjerke fan Koarnwert yn in bysûnder muzikaal en poëtysk poadium. Dan fynt dêr in feestlike reüny plak fan âld-studinten, sjongers en dielnimmers oan literêre bustochten, allegear ea belutsen by muzikale útfieringen om it wurk fan dichter Obe Postma hinne. De middei liket in waarme werbelibbing te wurden fan in unyk stikje Fryske kultuerskiednis.

Oarsprong muzikale tradysje

De oarsprong fan dizze muzikale tradysje giet werom nei 1983, doe’t muzykdosint Hindrik van der Meer tegearre mei kollega’s Jan de Jong en Tom Dykstra in bysûnder projekt opsette om it wurk fan Obe Postma – berne yn Koarnwert hinne. Studinten fan de Snitser Pabo keazen elk in gedicht fan Postma en presintearren dat muzikaal of teatraal. De útfiering, bedoeld as stipe foar it restauraasjefûns fan de tsjerke, luts in ûnferwachts grutte mannichte en krige loovjend omtinken yn de Ljouwerter Krante. Letter folgen in cd mei Obe Postma-lieten en literêre bustochten ûnder begelieding fan Hindrik en Beitske van der Meer.

Reüny

De Obe Postma-kommisje nûget no elkenien út om dizze rike skiednis te fieren. Mei muzyk, poëzy, oantinkens – en foaral: mei elkoar. De organisatoaren hoopje yn it bysûnder âld-dielnimmers werom te sjen fan de Pabo-útfiering, de bustochten en de sjonggroep ‘Auke Roukes’ út de Legeaën. Kenne jo josels of kenne jo ien dy’t belutsen wie? Lit it witte!

Tentoanstelling Obe Postma

Yn de simmer fan 2025 is der in tentoanstelling oer Obe Psstma yn ‘e Koarnwerter tsjerke. De Koarnwerter Obe Postma-kommisje organisearret dêrom eveneminten yn de tsjerke.