Fan 7 oant en mei 11 july binne studinten fanút de hiele wrâld yn Grins foar de ‘Old Frisian Summer School’. De OFSS fynt sûnt 2019 twajierliks plak, om-en-om yn it Britske Oxford en yn Grins, as in gearwurking fan dy beide universiteiten. Dochs is dit pas de earste kear dat de ynternasjonale studinten yn de Martinistêd delstrike: yn 2021 moast de Grinzer edysje noch online troch koroana. De 33 dielnimmers krije in wikelang fan allerhanne ekspêrs les oer it Aldfrysk. Op de woansdeis is der in dei yn Ljouwert, dêr’t hja ûnder oaren delgean by de Fryske Akademy, it Frysk Museum, it Provinsjehûs en Tresoar, dêr’t se ek de Aldfryske hânskriften fan de ferneamde Richthofenkolleksje besjen sille.

It Aldfrysk is it Frysk fan de midsiuwen, doe’t Fryslân noch folle grutter wie as no, ynklusyf de Grinzer Ommelannen en it Dútske Ostfriesland. De Friezen skreauwen foaral rjochtsrigels op – yn it Frysk, om’t de Friezen doe frij wienen en dy frijheid útdrukten troch harren eigen rjocht yn harren eigen taal fêst te lizzen. De ynternasjonale oandacht foar it Aldfrysk nimt al mar ta, mei troch de takenning fan in UNESCO-erfgoedstatus oan de Richthofenkolleksje fan Tresoar, yn 2022. Mar foaral om’t it Aldfrysk tige nei besibbe is oan it Aldingelsk, dat troch tûzenen minsken oer de hiele wrâld bestudearre wurdt.

De Old Frisian Summer School is in inisjatyf fan Anne Tjerk Popkema (Ryksuniversiteit Grins) en Johanneke Sytsema (Oxford University), dy’t ek de organisaasje yn hannen hawwe. Tresoar en de Fryske Akademy binne partners, wylst de Stifting FFYRUG finansjele stipe ferlient.

Op de website fan de OFSS is ek it programma te downloaden: https://www.rug.nl/education/summer-winter-schools/old-frisian/