’n seminaar aangebied deur Prof Karen de Wet (UJ)

Met haar debuutbundel Uit die kroes (April 2020) voeg Lynthia Julius haar stem by die breër tradisie werk deur vrouedigters in Afrikaans waarin op verskillende maniere reageer word op die verlede. Dit gebeur o.a. deur ’n ondersoek na identiteit en ’n bewuste meewerk aan die realisering van ’n betekenisvolle toekoms. Die paradigma hier kan breër of nouer getrek word, maar dink voorlopig aan Lady Anne (Antjie Krog), Tye en swye van Hester H (Melanie Grobler), Diana Ferrus oor Sara Baartman en Ronelda Kamfer met veral Hammie en Chinatown.

Julius se gedigte plaas haar voorts midde ’n duidelik waarneembare oplewing van tydgenootlike digters in wie se poësie ook perspektiewe gebied word op afkoms, onderdrukking, onreg, identiteit en vroue, en waarin die eietydse jong vrou, en ook spesifiek die jong vrou wat in Afrikaans en variante daarvan dig, voorop staan. Deel van die nuwe generasie in die Afrikaanse poësie, die born free-generasie.

In my lesing van Uit die kroes dui ek aan hoe die spreker (en hierdie generasie jong digters) haar bykans onafwendbaar in die sleurstroom van die verlede (sowel ’n politieke historie as ’n literêre sisteem) bevind en hoe sy dit in en deur die poësie verreken en daarmee afreken. Dit is ’n geskiedenis van voorsate maar ook direkte familie, dit is ’n reaksie teen voorgangers in die Afrikaanse poësie. Die lesing neem twee stelle gedigte uit die bundel as uitgangspunt, naamlik dié waarin oor historiese onreg geskryf word (en hier veral gedigte waarin lewensgroot portrette van historiese figure en werklikhede gegee word); en dan ook gedigte waarin eietydse sosiaal-maatskaplike werklikhede belig word, naby aan die nerf: die gegradueerde werklose jong vrou, studente aborsies, genderkwessies.

Datum 27 Mei 2021
Tyd 09:00-10:30
Plek Blackboard Collaborate
RSVP Voltooi asseblief die vorm by https://forms.gle/y6WEAVq7btCVa2HH8 voor 26 Mei 2021, 17:00
Navrae Kontak Bibi Burger by bibi.burger@up.ac.za