Ena Jansen het 30 jaar lank in Nederland gewoon. Nadat sy haar MA op Stellenbosch verwerf het, het sy as 23-jarige in Utrecht Teoretiese Literatuurwetenskap gaan studeer en daarna as joernalis en vertaler in Amsterdam gewerk. Tussen 1984 en 2000 was sy verbonde aan die Departement Afrikaans en Nederlands by Wits in Johannesburg. Daarna het sy Neerlandistiek aan die VU in Amsterdam gedoseer en in 2002 hoogleraar Suid-Afrikaanse letterkunde aan die Universiteit van Amsterdam geword. Sy het baie artikels en ook boeke geskryf oor Elisabeth Eybers en oor egodokumente wat tydens die Anglo-Boereoorlog geskryf is. Haar boek Soos familie (2015) handel oor die representasie van huiswerkers in die Suid-Afrikaanse letterkunde en het ook in Nederlandse en Engelse weergawes verskyn: Bijna familie (2016) en Like Family (2019). Die afgelope tyd rig sy haar op die vertaling van Nederlandse romans in Afrikaans. Maria Dermoût se De tienduizend dingen is in 2022 gepubliseer en Multatuli se beroemde boek Max Havelaar (1860) verskyn in 2024 in Afrikaans by Protea.