Yn novimber is FeRstival der wer. Dizze Fryske foardrachtwedstriid foar middelbere skoallen is dit jier foar de 80^ste kear! Dit jier is ek in FeRstival-projekt yn Searje 36 en in gastles fan in Fryske dichter oer foardragen.

By FeRstival drage learlingen sa moai mooglik in Frysk gedicht foar. Alle jierren dogge der sa’n 90 learlingen út it fuortset ûnderwiis mei. Minsken as Rients Gratama, Nynke Laverman en Theun Plantinga hawwe allegearre harren earste stappen op it poadium set by FeRstival. Yn it boekje Fersefariaasje steane de gedichten dêr’t de learlingen foar de foarrondes út kieze kinne.

Learlingen kinne meidwaan yn trije kategoryen: Starters (klasse 1), Trochsetters (klasse 2 en 3) en Toppers (klasse 4 of heger en studinten mbû en hbû). De winners út de foarrondes drage nochris foar yn ’e grutte finale. Der binne yn alle kategoryen prizen te winnen foar de nûmers 1, 2 en 3. De earstepriiswinners krije as ekstra priis in foardrachtklip.

De foarrondes binne dit jier op:

• freedtemiddei 3 novimber yn De Stolp, Smidsstraat 6 Snits (13.30 oere)
• freedtemiddei 10 novimber yn Iduna, Oliemolenstraat 16 Drachten (13.30 oere)
• moandeitemiddei 13 novimber yn de Stadskas fan Explore the North, Oldehoofsterkerkhof, Ljouwert (13.30 oere)

De finale is op:

• sneon 9 desimber yn it Posthuis Theater op It Hearrenfean (13.30 oere)

Gastles FeRstival yn septimber of oktober (fol is fol)

Dichter Arjan Hut, âld-dielnimmer en aktrise Brecht Wassenaar en oare dichters fersoargje in workshop fan ien of twa lesoeren op skoallen. Dy gastles wurdt fergees oanbean mei help fan it projekt Keunstryk.

FeRstival yn Searje 36

Nei de simmerfakânsje stiet der in nagelnij projekt fan sa’n 4 wiken oer FeRstival yn Searje 36:

Mei it nije projekt FeRstival yn Searje 36 wurdt it foardragen fan in Frysk gedicht sintraal stelt. Learlingen komme yn de kunde mei it evenemint, dat yntusken al mear as 80 jier holden wurdt. Oan de hân fan nijsgjirrige filmkes mei Brecht Wassenaar en âld-winner Danian (dy’t in nij gedicht fan Jelle Bangma foardraacht) leare sy wat goed foardragen ynhâldt, hoe’t de sjuery dernei sjocht en krije sy in bulte tips mei. Dan wurdt der in kar makke út tsien gedichten, skreaun foar Fersefariaasje 2023, om sels mei te wurkjen en te oefenjen. De mooglikheid bestiet om de earder neamde gastles oer foardragen hjiroan ta te heakjen. Tige handich! De ein fan it projekt is in eigen wedstriid op skoalle. Wa draacht it moaiste syn of har gedicht foar? Wa sil de skoalle represintearje op it oankommende FeRstival? It poadium ropt!

Mear ynformaasje en oanmelde?

Sjoch op https://www.ferstival.frl/