Fan hjoed ôf is dit platfoarm fan en foar frisisten ‘live’. In plak dêr’t wy lêze en skriuwe kinne oer ús wurk yn de frisistyk. It sil hjir net allinnich gean oer Fryske taalkunde, letterkunde en skiednis yn Nederlân en Dútslân, mar ek oer Frysk yn it ûnderwiis en Frysk taalbelied.

Binnen en bûten Fryslân wurdt der safolle ûndersyk dien nei it Frysk. Dat moatte we foaral net allinnich binnen it eigen fakgebiet fia de wittenskiplike, ynternasjonale kanalen presintearje, mar ek krekt op lokale en nasjonale skaal. Dêrom is der no Frisistyk.nl: in tagonklik en leechdrompelich poadium dat romte biedt foar de ferwûnderingen en iepen einen fan ús fak. It is in manier om ús wurk te presintearjen oaninoar, oan de nije generaasje ûndersikers en oan in breder publyk.

Frisistyk ferwolkommet bydragen fan elkenien dy’t him of har mei de frisistyk dwaande hâldt. Dat kinne sawol artikels wêze as nijsberjochten, fakatueres of oankundigingen.

Wolst mear witte, mei helpe, mei tinke of mei skriuwe? Wit ús te finen en mail nei amerkuur@fryske-akademy.nl