Op sneon 25 novimber wurde twa stroffelstiennen yn Burgum pleatst troch de Dútske keunstner Gunter Demnig. It bysûndere fan de beide stiennen is dat de opskriften yn de Fryske taal binne. Dat binne tagelyk de earste Frysktaligen fan de mear as tweintichtûzen dy’t op mear as 1200 plakken yn Europa lizze.

Stroffelstiennen, yn it Dútsk ‘Stolpersteine’ binne messing stientsjes dêr’t slachtoffers fan it nasjonaal-sosjalisme yn en om de twadde wrâldoarloch hinne mei betocht wurde. Op de beide stientsjes steane de nammen fan de Joadske ûnderdûkers Paul Kaufmann (1887-1943) en syn frou Klara Katharina Kaufmann-Kaufmann (1888-1981). De stientsjes wurdt lein oan de Boargemaster Bothenius Lohmanloane foar it ûnderdûkershûs fan de Kaufmannen.

Stroffelstiennen wurde sûnt 1992 makke troch keunstner Gunter Demnig (www.stolpersteine.eu). Hy pleatst alle keunstwurkjes sels yn de publike rûmte foar huzen dêr’t slachtoffers yn de oarlochstiid wenne hawwe.

Boargemaster Bothenius Lohmanloane 1
Sneon 25 novimber 2023, 13.30-14.30 oere

Hjir is in list mei alle stroffelstiennen yn de provinsje Fryslân.