Kwalster is in heal teraande (en ek wol wer opferzen) laach snie. Kwalster is ribbelich en net stevich, je sakje der samar troch hinne en it ferrifelet de rider. It iis kin kwalsterich wêze en as snie teit, dan kwalsteret it. Kwalster hat ek in oare betsjutting: in kwak slimerige flibe, in rachel. 

Yn it Nederlânsk is kwalster amper gongber, de wurdboeken hawwe it al, mar yn korpora en op ynternet is it net frekwint. It Grinslânsk hat kwaalster. Neist de neamde betsjuttingen, wurdt it dêr ek brûkt foar ‘in kwak fûgelstront’ en ‘yn it wetter driuwende smoarge massa’. It Noard-Frysk, Drintsk en Stellingwerfsk kenne kwalster ek. Yn it Noardlike Dútsk komt it foar as Qualster, allinnich yn de betsjutting ‘rachel’. It soe fan Qual (kwal) komme. De oergong fan rachel op ‘opferzen snie’ soe te krijen hawwe mei de grûnbestjutting fan kwal: slimerich wêze. De bestjuttingen yn it Grinslânsk stypje dat.