![](https://neerlandistiek.nl/wp-content/uploads/2024/07/csm_lingotell_bystocksnap_pixabay_5200f7c28d-1024x683-1.jpg)
Op 6 juny l.l. organisearre it Mercator Europees Kennissintrum, yn de mande mei Tresoar, yn kafee de Gouden Leeuw in ynspiraasjemiddei. Dat waard dien yn it ramt fan it Lingotellprojekt, in Creative Europe-projekt tusken Noarwegen, Hongarije en Fryslân oer it werfertellen fan tradisjonele ferhalen. Mei it ferhaal fan de Wylde Boerinne fan T.E. Holtrop as reade tried giene sa’n 30 dielnimmers te set mei workshops oer ferhalen fertellen yn ferskate foarmen. It ferhaal fan de Wylde Boerinne wurdt al in iuw lang yn ferskate foarmen op ‘e nij ferteld, lykas yn in harkspul, lokaasjeteater, in stripboek en der is sels in audiotoer fan. Wat makket dat dit ferhaal noch hieltyd oansprekt, en hoesa is it wichtich dat dizze hieltyd wer ferhalen ferteld wurde? Hokfoar karren wurde makke by it omfoarmjen fan it oarspronklike ferhaal? Froukje Sijtsma (ferhalemakker), Annalies Outhuijse (makker fan histoaryske escaperooms), Ypy Zysling (regisseur) en Douwe Kootstra (ferhaleferteller) ynspirearren de dielnimmers mei harren eigen ynsichten en de keuzes dy’t sy sels meitsje by it omfoarmjen en op ‘e nij fertellen fan histoaryske ferhalen, om sa de dielnimmers oan de workshops de hânfetten oan te rikken om foarneamde fragen sels beäntwurdzje te kinnen. Op ferskate skoallen fan it fuortset ûnderwiis en it mbû sille learlingen nei de simmer sels ek oan de slach mei it omfoarmjen en neifertellen fan tradisjonele, Fryske ferhalen, om sa better te begripen wat dizze ferhalen betsjutte foar ús Fryske identiteit en kultuerhistoarje.
Lês of lústerje hjir nei Froukje Sijtsma oer wat sy sa moai fynt oan De Wylde Boerinne.
Laat een reactie achter