De Fryske Akademy Skripsjepriis 2022-2024 is op de Akademydei takend oan Sannah Debreczeni. Debreczeni hat har masterskripsje,Exploring the Link Between Attitudes and Intelligibility in the Frisian Context: Introducing the Theory of Planned Behaviour, foltôge foar de oplieding Research Master Language & Cognition oan de Ryksuniversiteit Grins op 28 juny 2022. De priis bestiet út in oarkonde en in bedrach fan €1000,-.

Der bestean in soad ideeën en oannamen oer it ferbân tusken de fersteanberens fan it Frysk en de hâldingen foar de taal oer. Faak hawwe minsken dy’t sizze gjin Frysk te ferstean in negativere hâlding tsjin de taal oer, is de gedachte. Mar hoe sit dat no presys? Hawwe minsken dy’t gjin Frysk prate in negativere attitude omdat se it frysk net goed ferstean? Of ferstean se it net goed om’t se in negative attitude hawwe?  Sannah hat dat ûndersocht troch gebrûk te meitsjen fan de saneamde theory of planned behaviour. Dêrmei is har ûndersyk in wichtige bydrage oan de ynternasjonale taalwittenskip. It ûndersyk is ek tige relevant foar de Fryske kasus. Ut de resultaten die nammentlik bliken dat allinne hâldingen oangeande de faktor ‘modern’ de fersteanberens foarsizze koenen. Mei oare wurden: minsken dy’t it Frysk as moderner beskôgen koenen de taal better ferstean. Dizze resultaten binne tige weardefol en nijsgjirrich foar de Fryske mienskip en jouwe oanlieding foar fierder ûndersyk.

In earfolle fermelding is takend oan Herman van Vliet. Van Vliet hat syn masterskripsje, De eetcultuur aan het Friese stadhouderlijke hof in de eerste helft van de 18e eeuw, foltôge foar de oplieding MA Geschiedenis Vandaag oan de Ryksuniversiteit Grins op 26 novimber 2022. De skripsje jout in hiel moai ynsjoch yn in oansprekkend, nijsgjirrich en ferrassend aktueel ûnderwerp, dat er presintearre hat troch de perspektiven fan trije dielnimmers te analysearjen. De sjefkok, de hovenier en de hofdame hawwe alle trije nijsgjirrige geskriften neilitten dy’t by elkoar in kompleet plaatsje opsmite.