Oait waard it lytse gebouke neist de bakkerswinkel yn Ysbrechtum brûkt as opslach fan brânwachtspuiten, in blommist ferkocht der in skoft blommen, mar no kinne minsken der boeken helje en bringe. Wolkom by De Boekenbakker.

Doe’t de bakkerswinkel yn it doarp koartlyn opknapt waard, soargen de trije freondinnen Anneminke, Brucia en Tjessaline derfoar dat ek de minybyb, oprjochte yn koroanatiid, in update krige. ‘Mei frisse kleurkes en boekekasten fol moaie boeken wolle wy de minybyb oantrekliker meitsje,’ fertelt Anneminke. ‘Wy fine it sels hearlik om te lêzen, en dy leafde wolle wy graach oerbringe op lytse en grutte bern en op oare folwoeksenen. Dêrom hawwe wy it ek moai oanklaaid. Moatst minsken hjoed-de-dei in bytsje ferliede om te lêzen.’

Op de priisfraach hoe’t de minybyb hjitte moatte soe, kaam Fenna út Turns as winner út ‘e bus: De Boekenbakker. ‘Geweldich betocht, want it gebou heart ek by de bakkerij.’ Yn de minybyb fynst in ferskaat oan boeken, ek Frysktalige. Ysbrechtum hat trouwens ferskate bekende literêre ynwenners fuortbrocht. De Fryske dichter Douwe Tamminga (1909-2022) en ek Hylkje Goïnga (1930-2001), skriuwer fan Frysktalige romans en ferhalen, wennen yn it doarp. ‘En de no bekende dichter Joost Oomen is hjir opgroeid en yllustrator en berneboekeskriuwer Marianna van Tuinen wennet hjir alwer in pear jier.’

Sadwaande stean by De Boekenbakker gedichten fan Tamminga en Oomen útstald. ‘Foaral dy fan Tamminga is wol hiel tapaslik foar in minybyb,’ laket Anneminke. ‘It hjit ‘Kleiliet fan it net-lêzen boek’ en giet oer it fergetten boek.’

Dit stikje is ferskynd op de webside fan Tresoar