YnSicht, skoalle fan OSG Piter Jelles (ûnderdiel fan OVO Fryslân-Noard), sil as earste tmbû-skoalle yn Fryslân it Frysk as eksamenfak oanbiede yn de beropsrjochte profilen op it tmbû. Tongersdei 14 novimber is by in besite fan amtners fan it ministearje fan OCW en Provinsje Fryslân stilstien by dy mylpeal foar it tmbû.

Deputearre Eke Folkerts: “YnSicht hat sjen litten dat der yn koarte tiid grutte stappen set wurde kinne oangeande it Frysk. Wy binne bliid mei safolle ynset en entûsjasme. Wy hoopje dat alle tmbû-skoallen yn Fryslân it foarbyld fan YnSicht folgje sille.”

Eftergrûn

Tmbû-skoallen yn Fryslân kinne sûnt dizze moanne it fak Fryske taal en kultuer opnimme yn it eksamenpakket fan de beropsrjochte profilen yn tmbû basis, tmbû kader en tmbû mingde learwei. Dat is in wichtige stap yn it fersterkjen fan de posysje fan it Frysk yn it ûnderwiis yn Fryslân, dêr’t oan wurke wurdt binnen Taalplan Frysk 2030, en slút oan by ôfspraken makke tusken Ryk en provinsje yn de Bestjoersôfspraak Fryske taal en kultuer (BFTK).

Troch in oanfraach yn te tsjinjen by it ministearje fan OCW kinne skoallen tastimming freegje foar it opnimmen fan it Frysk yn it eksamenpakket fan de beropsrjochte profilen. Skoallen kinne foar dy oanfraach gebrûk meitsje fan foarbyldbrieven. Elke skoalle kin de brieven oanpasse oan de eigen situaasje en sa maklik tastimming freegje.

It opnimmen fan it Frysk yn it eksamenpakket fan de beropsrjochte profilen jout learlingen de kâns om talige kompetinsjes te ûntwikkeljen yn sawol de Fryske as de Nederlânske taal. Dat befoarderet de trochstream nei it mbû. Ek binnen de beide mbû-ynstellings yn Fryslân, Firda en Aeres, wurdt wurke oan it fersterkjen en ferankerjen fan de posysje fan it Frysk. Wannear’t de learlingen op it tmbû it Frysk yn harren eksamenpakket opnimme kinne, ûntstiet der in goede trochgeande learline Frysk. Dat soarget derfoar dat learlingen goed funksjonearje kinne yn de twatalige arbeidsmerk yn Fryslân.