Op sneon 17 maaie is de earste tekst ferskynd fan it 100 dagen duorjende projekt ‘Klein geluk | Lyts gelok’ fan Ljouwert UNESCO City of Literature. It giet om de tekst ‘Tu es là?’, ôfkomstich út it koarte ferhaal ‘L’infini’ (It ûneinige) fan de Frânsk-Koreaanske skriuwster Elisa Shua Dusapin. Keunstner Machiel Braaksma ûntwurp de letters en pleatste dy op it Observeum yn Burgum. Yn de nacht fan 16 op 17 maaie waard by de stjerrewacht de tekst ûntbleate, wêrmei’t it projekt offisjeel begûn is.

Under Arcadia lit Leeuwarden City of Literature alle dagen in literêre tekst opdûke yn Fryslân. Dit kin in fragmint wêze of in folslein ferhaal. De komplete tekst is op de dei fan ferskining hieltyd fan 12.00 oere ôf te lêzen op kleingeluk.frl. Op de webside is no al te lêzen hokker 100 auteurs meiwurkje oan it projekt, dat fierder benammen draait om ferrassing. It giet om 40 skriuwers út Fryslân, 33 út de rest fan Nederlân, 9 út Flaanderen, 12 fan kollega-Cities of Literature en 6 oare ynternasjonale skriuwers.

Ferwûndering sintraal De skriuwers krigen de opdracht om in tekst te skriuwen oer lytse mominten fan ferwûndering. Yn tiden fan grut leed yn ’e wrâld, wol Leeuwarden City of Literature mei it projekt ûndersykje hokker alledeiske dingen treast en wille bringe kinne. De auteurs mochten foar harren bydrage in eigen foarm kieze, lykas in ferhaal, gedicht, essay of stripferhaal. Ek de ferskiningsfoarm is hieltyd in ferrassing, om sa by te dragen oan de ferwûndering. De organisaasje wurket hjirfoar gear mei keunstners, foarmjouwers en ferskate lytse en grutte organisaasjes. Wa’t him oanmeldt foar de Lyts gelok-mail, krijt alle dagen ynformaasje oer de nije tekst en in hint foar it fynplak fan de tekst foar de dei dêrnei.

Lyts gelok-optredens Wat de organisaasje al wol ferklappe kin is dat der by in tal literêre eveneminten Lyts gelok-optredens plakfine sille. It giet hjirby om Dichter op de Deel (sa 25 maaie), Hoge Woorden (fr 30 maaie), de literêre middei yn Het Tripgemaal (sa 10 augustus) en by de ôfsluting fan Bouwurk (sn 24 augustus). Ek giet Uitgesteld geluk, it eardere Arcadia-projekt fan Leeuwarden City of Literature, ien kear op werhelling. Op tongersdei 10 july wurdt der om 19.30 oere foarlêzen yn Beammetún It Boukeboskje yn Wikel.