Tsien acts noch yn ‘e race foar finale

It Fryske publyk kin fan 16 juny ôf online in stim útbringe op ien fan de tsien acts, dy’t noch yn de race binne foar in finaleplak fan Liet 2025. It Fryske sjongfestival wurdt dit jier op tongersdei 11 septimber hâlden yn poppoadium Neushoorn yn Ljouwert. De act mei de measte stimmen fan it Fryske publyk kwalifisearret him streekrjocht foar de finale. Der kin stimd wurde fia www.liet.frl. De oare seis finalisten wurde oanwiisd troch de seleksjesjuery, besteande út Christa Niklewicz (dichteres), Denise Rivera (sjongeres), Johanna Brinkman (sjoernaliste by Omrop Fryslân) en Sophie Schakelaar (eigeneres fan Artistic Recordstore yn Grou).

“Wy binne tige grutsk op de tsien lieten dy’t keazen binne troch de seleksjesjuery. De artysten ûnderskiede harren mei eigentiidse muzyk en teksten. De Fryske taal libbet en is wer hip! We hoopje fansels dat ek dit jier it Fryske publyk ús evenemint wit te finen en harren favorite akt nei in finaleplak stimt!”, sa seit foarsitter Pieter de Boer fan Stifting Liet.

Oant en mei freed 27 juny kin stimd wurde op ien fan de folgjende acts: Lotte Broersma, Swa’t & Co, Anke, Mayte, Anke Stilma, Sym & Sanne, Welmoed, Anna Spark, Rowan Veltman en Dani.

De kaartferkeap set ynkoarten út ein fia Neushoorn.

Liet

Sûnt 1991 wurdt jierliks it Fryske sjongfestival Liet organisearre. De finale fan Liet hat altiten plak fûn yn Ljouwert, de haadstêd fan Fryslân. Betingst foar dielname oan Liet is dat de tekst fan it nûmer fan de dielnimmende artyst yn it Frysk is of yn ien fan de yn Fryslân sprutsen streektalen.

Nei oanlieding fan it 10-jierrich bestean fan Liet is yn 2002 foar it earst Liet International organisearre (doe noch ûnder de namme Liet Ynternasjonaal). Mei dielnimmers út Europeeske regio’s dêr’t ek in regionale of minderheidstaal sprutsen wurdt. De winner fan Liet giet automatysk ek nei de edysje fan Liet International dat jier. Liet International fynt sûnt 2014 alle 2 jier plak.