(Persbericht burgerinitiatief Sis tsiis)
‘Frysk op skoalle: in bernerjocht’. Mei dat rjochtfeardich doel wurdt tongersdei 22 desimber yn de binnenstêd fan Ljouwert de alderearste manifestaasje foar mear en better Frysk ûnderwiis holden. De organisearjende boargerinisjatyfgroep Sis Tiis sil mei in fakkeloptocht troch de stêd omtinken freegje foar syn stribjen: in folle rommer plak foar it Frysk op skoalle, gjin ûntheffingen foar skoallen om Frysk te jaan mar just stipe, mear trijetalige skoallen en mear lessen yn it Frysk op sokke skoallen.
Publyk wurdt ferwachte fan 18.30 oere ôf op it Saailân. Artysten Gurbe Douwstra, Gerrit Breteler, Clara Rullmann, ‘sterke man’ Wout Zylstra en in ôffurdiging fan de Ljouwerter doedelsekband Graham Lowlanders wurkje mei oan de manifestaasje en trede op. Tsientallen Fryske promininten ûnderstypje de doelen fan Sis Tsiis. Under mear Anneke Douma, Durk Gorter, Rients Gratama, Lutz Jacobi, Goffe Jensma, Iris Kroes, Eelke Lok, Johannes Rypma, Freark Smink, Hylke Speerstra en Piter Wilkens stean op in list mei hast sechstich hântekeningen.
Neffens Sis Tsiis sit it Frysk op skoalle slim yn ’e knipe, sawol yn it basis- as yn it fuortset ûnderwiis. ,,Bern krije net, of te min, dêr’t se rjocht op hawwe: goed ûnderwiis yn de memmetaal”, seit dichter Abe de Vries, ien fan de inisjatyfnimmers. ,,Dat set in rem op har fierdere ûntjouwing. Dêrneist is der in protte nasjonale en ynternasjonale regeljouwing om in minderheidstaal as it Frysk te beskermjen en te befoarderjen, dêr’t de Provinsje en it ryk op dit stuit lang net oan foldogge. Der wurdt in protte dien, mar it moat better. Wy wolle de needsaak fan in oar belied op de politike aginda hawwe.”
Ek de Ried fan Europa is ûntefreden oer de ûnderwiissitewaasje wat it Frysk oanbelanget. Yn it krekt ferskynde (14 desimber) fyfde rapport oer it neilibjen yn Europa fan it Hânfêst foar Regionale en Minderheidstalen, dat tige kritysk is oer Nederlân, is ien fan de oanrikkemandaasjes it fersterkjen fan it ûnderwiis yn it Frysk op alle ûnderwiistypes, sadat de Friezen har eigen taal goed lêze en skriuwe kinne sille.
Sjoch foar mear ynformaasje:
Laat een reactie achter