Ofrûne wiken foelen twa Frysktalige skripsjes yn de prizen. Thom de Haan wûn de Grutte Fryske Wurkstikpriis, mei syn Frysktalige masterskripsje dy’t er skreau foar de Master Multilingualism oan RUG. De Grutte Fryske Wurkstikpriis is yn it libben roppen troch de fakseksje Frysk fan de Vereniging Leraren Levende Talen, om learlingen yn it fuortset ûnderwiis en studinten yn it beropsûnderwiis en it heger ûnderwiis te stimulearjen om mei it Frysk en Fryslân oan de slach te gean. Thom syn skripsje gie oer de ynfloed fan it Biltsk en it Stedfrysk op it Frysk en seach nei de ynfloed fan sawol it praten fan it Biltsk of Stedfrysk as it identifisearjen
as Biltker op de attitudes foar it Frysk oer en de taalfeardigens yn it Frysk. Foar frisistyk skreau er der foarich jier al in stik oer.

Welmoed Sjoerdstra wûn de EFNIL Master’s Thesis Award fan de European Federation of National Institutions for Language, mei har Frysktalige skripsje oer differinsjaasje by it fak Frysk yn de ûnderbou, dy’t se skreau foar de Master Applied Linguistics oan de RUG. Dizze thesis award wurdt alle jierren útrikt oan de trije bêste Masterskripsjes yn Europa op it gebiet fan taalgebrûk, taalbelied en meartaligens. As ûnderdiel fan de priis mei Welmoed yn septimber har skripsje presintearje op de EFNIL-konferinsje yn Budapest. Ek Welmoed skreau oer har ûndersyk foar frisistyk, dat is hjir te lêzen.