Op dit stuit is de Fryske Akademy yn gearwurking mei de Universiteit van Amsterdam (UvA) op syk nei in promovendus.

It giet om in foltiidske promovendus-oanstelling (38 oeren wyks) foar 4 jier. Reagearje kin oant 21 oktober 2024, sjoch de webside fan de Fryske Akademy foar mear ynformaasje.

Funksje-omskriuwing

De Fryske Akademy biedt yn gearwurking mei de Universiteit van Amsterdam ien promoasjeplak foar fjouwer jier op it mêd fan de Fryske taal en kultuer. Ast op syk bist nei in nijsgjirrich wurkplak dêr’tst selsstannich ûndersyk dwaan kinst en dêr’t belangstelling foar de Fryske taal ferbûn wurdt mei eigentiidsk ûndersyk oan ien fan de Europese topuniversiteiten op it mêd fan taalwittenskip, dan biede wy no in unike mooglikheid. Troch de gearwurking tusken Fryske Akademy en Universiteit van Amsterdam krijst tagong ta in sterke, ynternasjonale ûndersyksomjouwing en tagelyk ta spesjalistyske kennis oer Fryslân en de Fryske taal.

Do skriuwst yn fjouwer jier in proefskrift oer it tema ‘Tense, Mood and Aspect in Verbal Morphology of Old Frisian’. Dit ûndersyk is part fan it projekt ‘The Roots of Old West Frisian’ en leveret ek in bydrage oan de opbou fan de Taaldatabank. De projektbeskriuwing is taheakke by de advertinsjetekst op de webside fan de Fryske Akademy.

Foar de útfiering fan it ûndersyksprojekt binne wy op syk nei kandidaten mei in eftergrûn yn of dúdlike affiniteit mei de taalkunde, benammen morfology en syntaxis en mei each foar histoaryske/diagroane aspekten. In oantoanbere affiniteit mei it Frysk en/of bestudearring fan de Fryske taal strekt ta oanbefelling.

Funksje-easken

• in mastertitel mei treflike sifers yn in oanbelangjend fakgebiet;
• fereaske talekennis: Ingelsk (dominante taal fan publikaasjes) en de reewilligens om op koarte termyn funksjonearje te kinnen yn in omjouwing dêr’t Frysk en
  Nederlânsk as fiertaal brûkt wurde; foar de bestudearring fan de âldere fakliteratuer is passive kennis fan it Dútsk nedich;
• treflike akademyske skriftlike en mûnlinge feardichheden;
• goede sosjale en organisatoaryske feardichheden;
• grutte belangstelling foar in wittenskiplike karriêre.

Ynljochtingen

Foar mear ynformaasje sjoch de advertinsjetekst op de webside fan de Fryske Akademy.

Stânplak

De promovendus komt foar in part by de Fryske Akademy yn Ljouwert en in part by de Universiteit van Amsterdam te wurkjen. Yn oerlis en mei each foar dyn persoanlike omstannichheden sil dat oer dy fjouwer jier tusken de 40 en 60% yn Ljouwert of Amsterdam wêze. De promoasje is oan de Universiteit van Amsterdam.