Nei njoggentich jier bestean lûkt de Kristlike Fryske Folks Bibleteek (KFFB) de stekker derút. Yn desimber 2024 ferskynt it alderlêste boek, dêrnei wurdt de Fryske boekeklup opheft. ‘Ivich skande’, fynt bestjoerslid Martsje de Jong fan de Kristlike Fryske Folksbibleteek (KFFB) it dat de boekeklup dit jier syn lêste publikaasjes útbringt. Mar foar it bestjoer wie der gjin oare kar: ‘Wannear’tst alle jierren 10.000 euro talizze moatst, dan komt der in momint dat de reserves op binne.’

Yn it tinkskrift fan 2009, dat mei it 75-jierrich bestean fan de KFFB ferskynde, wienen de kraskes en de kwetsberheid al wol dúdlik sichtber: ‘Hoelang’t de KFFB noch bestean sil, is min te sizzen. Wol is it sa dat it nochal wat ferget om op grûn fan frijwillichheid minsken oan te lûken dy’t itselde dogge as kommersjele útjouwers.’ De Frysktalige boekeklup hâlde it noch fyftjin jier fol, mar lûkt de stekker der no definityf út. ‘Tiden hawwe tiden’, seit De Jong. ‘Mar ik fyn it wol oergryslik skande dat in klup dy’t sa’n grutte rol spile hat yn de Fryske literatuer gjin besteansrjocht mear hat. We meie as Friezen wol wat grutsker wêze op wat we hawwe.’

Ledebestân

Yn de jierren sechtich hie de KFFB mear as 12.000 leden. Hjoed-de-dei binne dat noch in lytse 500 en dy bestean benammen út âlderein. ‘Dat binne dus wol 500 minsken dy’t graach Frysktalige boeken lêze wolle.’ Foar De Jong fielt it soms oft dy âldere doelgroep ‘ferbean’ is. ‘Wêrom dy eangst? Der is gjin lân sa griis as Fryslân, dus wêrom soest dan net ynspylje op in fraach nei boeken foar dy doelgroep?’

Wat De Jong lestich te ferkeapjen fynt is dat de measte Fryske romans by oare útjouwers meastentiids net iens oplagen boppe de 300 helje. ‘Der is dus in merk, mar gjin inkelde spiler yn it literêre fjild is yngien op ús oanbod om ús ledebestân oer te nimmen. Der binne sa stadichoan net in soad útjouwers mear dy’t folwoekseneliteratuer útbringe.’

Dochs tinkt De Jong dat der wol ferlet fan is. ‘Dat sjogge we wol mei sutelaksjes. Dan wurdt der in soad ferkocht. Ik bin derfan oertsjûge dat de PR-masine fan de Fryske literatuer stikken better kin. It fyn ik spitich dat der net in goed wurkjend promoasjeorgaan is foar alle Fryske literatuer. De provinsje soe doarre moatte dêr yn te ynvestearjen.’

Lêste publikaasjes yn 2024

Yn 90 jier tiid brocht de KFFB hûnderten Frysktalige romans en dichtbondels foar folwoeksenen út en tsientallen berneboeken, oersettingen en lieteboeken. ‘Dit jier binne noch de romans fan Jikke Olivier en Anders Rozendal ferskynd.’ Fierder wurdt yn desimber it berneboek Doe’t Johan in kealtsje krige útbrocht. It is in oersetting fan in boek fan Astrid Lindgren, fertaald troch De Jong sels. ‘Begjin 2025 is dan noch ús lêste jiergearkomste en dan giet it ljocht definityf út.’

Dit artikel is earder ferskynd op de webside fan Tresoar.