Dr. Mirjam Günther-van der Meij is mei yngong fan 15 juny de nije lektor fan it lektoraat Meertaligheid en Geletterdheid fan NHL Stenden Hegeskoalle. Günther-van der Meij folget Joana Da Silveira Duarte op, dy’t lektor wie sûnt 2019 en no heechlearaar Underwiiswittenskippen is oan de Ryksuniversiteit Grins.

Günther-van der Meij, sûnt 2017 wurksum foar NHL Stenden, wurke de ôfrûne jierren al as assistint lektor by itselde lektoraat. Under har lieding binne ferskate ûndersyksprojekten opset op it mêd fan meartaligens yn it primêr en fuortset ûnderwiis, rjochte op it Frysk en yn syn algemienheid op streek- en buortalen yn Noard Nederlân. Ek rjochtet se har yn har wurk op it ferminderjen fan letterswakkens (laaggeletterdheid) en it befoarderjen fan meartalige geletterdheid.

Yn 2021 waard har wurk beleanne mei de wittenskipspriis fan Campus Fryslân. Yn 2018 promovearre se oan de Ryksuniversiteit Grins en de Fryske Akademy op har ûndersyk nei de effekten fan twataligens op it learen fan in tredde taal.

De ynauguraasje fan de nije lektor sil nei alle gedachten yn it foarjier fan 2025 wêze.