Suzanne Dekker promovearre tongersdei 13 juny 2024 oan de Ryksuniversiteit Grins op har proefskrift ‘Multilingualism in Heads, Hearts, and Hands’: Attitudes towards the development, implementation, and evaluation of multilingual approaches in Frisian primary schools.

It promoasjeûndersyk is útfierd binnen it 3M Project (Meer kansen Met Meertaligheid) en giet oer it ûntwikkeljen, ymplemintearjen en evaluearjen fan meartaligens op Fryske basisskoallen. Binnen it 3M Project binne meartalige aktiviteiten ûntwikkele foar ferskillende doelgroepen learlingen. Dekkers ûndersyk giet oer de hâldingen tsjinoer meartaligens en it brûken fan dizze meartalige aktiviteiten, en hoe ’t de hâldingen harren ûntwikkelje yn de rin fan it projekt.

Dekker hat gebrûk makke fan kwantitative enkêtes en longitudinale analyze fan fideo-data, en kwalitative (longitudinale) ynterviews. “It ûndersyk lit sjen dat men oer it algemien posityf is as it giet om meartaligens, en in soad helje kin út dielname oan in projekt as 3M. Ek lit it sjen dat soksoarte projekten needsaaklik binne om meartaligens del te setten as prioriteit binnen de skoallen.” 

In gearfetting fan de dissertaasje yn trije talen (Frysk, Nederlânsk, Ingelsk) kinne jo hjir dellade.

Dekker wurket sûnt oktober 2023 as postdoc ûndersiker by it Mercator Research Centre, ûnderdiel fan de Fryske Akademy. Dêr wurket hja benammen oan it analysearjen fan de Taalsurvey, in grutskalich ûndersyk nei de hjoeddeistige sels-ynskatte taalfeardigens, attitudes en gebrûkspatroanen fan it Frysk. Ek is Dekker belutsen by it nije projekt InterGenerational Transmission of West-Frisian (IGT). Dêrneist wurket hja ien dei yn ‘e wike as ûndersiker by it lektoraat Meartaligens en Underwiis fan de Hegeskoalle fan Utert oan projekten oer effisjint ûnderwiis Ingelsk op de basisskoallen, meartaligens en lêsûnderwiis, en profesjonalisearring fan nijkommersspesjalisten.